Jonim fido

JONIM FIDO

Odil oilasi bilan qishloqda yashaydi. Qizi – Shoira, o‘g‘li - Shoxrux, oqila ayoli - Maftuna. Biroq, Odilning qo‘li kalta, u topgani bunisiga zo‘rg‘a yetadi. Odil moddiy sharoitni yaxshilash uchun shaharga ishga ketmoqchi bo‘ladi. Maftuna bunga qarshi chiqadi, ketmasligini so‘raydi. Odil xotiniga quloq solmaydi. Shaharga ketadi.
Shaharda beva, xushsurat erkaklarga o‘ch badavlat ayol – Zamira e’tiboriga tushadi. Zamira uni yoqtirib qoladi, boylik va maishat bilan boshini aylantiradi. Firmasidan ish beradi, shubhali moddiy operatsiyalarga aralashtiradi. Odil yengil hayotga berilib, oilasini unutadi. Xotini qo‘ng‘iroq qilsa jerkib beradigan odat chiqaradi. Maftuna xunuk mish-mishlar qulog‘iga yetgach shaharga keladi. Odil Zamiraning ko‘zi oldida uni yerga uradi, haqorat qiladi. Maftunaning yuragi pora-pora bo‘ladi. Yig‘lab qishloqqa qaytadi.  O‘g‘li xushsiz yotgani ustidan chiqadi. Bolani kasalxonaga eltadilar. Doktorlar dahshatli tashxis - Gemolitik-uremik sindrom yoki o‘tkir glomerulonefrit, ya’ni buyrak qurishi deb tashhis qo‘yadilar. Eri tomonidan ma’shuqasi ko‘z o‘ngida xo‘rlangan Maftuna yordam so‘rab Odilning yoniga borishni istamaydi. Qorindoshlaridan o‘g‘lini davolatish uchun pul yig‘moqchi bo‘ladi. Biroq, qorindoshlari ham o‘zlaridek nochor. O‘g‘liga buyrak ko‘chirib o‘tkazish kerakligini eshitgach, majbur erining yoniga boradi. Odil avvaliga xotiniga ishonmaydi, “Sen pulga to‘ymaysan, pul uchun kelgansan!” degan gaplarni qiladi. Maftuna doktorlar xulosasini ko‘rsatgach kasalxonaga boradi. Doktor bilan gaplashadi, o‘g‘lining ahvolini ko‘rib dahshatga tushadi. Zamiradan yordam so‘raydi. Yangi o‘ynash topib olgan Zamira unga bir tiyin ham pul bermaydi. Qaytaga bo‘yniga qarz yuklab, uydan haydab soladi. Odil oilasiga qaytadi. Lekin, oilaviy munosabatlar darz ketib bo‘lgan. Xotini ham, qizi ham uni kechirmaydi. 
Shu orada doktor buyrak uchun donor topilmasa bola uzoqqa bormasligini aytadi. Oila tang ahvolda qoladi. Hasratga chidolmagan Maftuna Odilga “Bu uyda yo siz, yo biz yashaymiz!” deb shart qo‘yadi. Odil uydan chiqib ketadi. Zamiraning yangi o‘ynashi Odilning uyiga keladi. Maftunaga “Ering qarzlarini uzmasa uyni nomimga o‘tkazib berasan!” deb shart qo‘yadi. Maftunaning hasrati zo‘rayadi. 
Shu orada Shoxruxga donor topiladi. Operatsiya yaxshi o‘tadi. Maftuna donor kimligini doktordan so‘raydi. Doktor uni bir palataga olib kiradi. O‘shandagina tomoshabinga Odil buyragini o‘g‘liga bergani ma’lum bo‘ladi. Retro ketadi. Doktor Odil bilan gaplashadi.  Tekshiruvda Odilning yashirin o‘pka kasalligi borligi aniqlangani, o‘g‘liga buyragini bersa operatsiyadan chiqmasligi, chiqsayam uzoq yashamaslik havfi borligini aytadi. Odil o‘g‘liga buyragini berish fikridan qaytmaydi.  Bu sahna Odilning o‘z xatosini tushunib yetgani, tavba qilgani va tragediyasini yanada kuchaytiradi. U o‘zining o‘limini bilib turib, o‘g‘li uchun o‘z jonini fido qiladi.
Ssenariy Maftuna, Shoira va tuzalgan Shoxruxning qabristonda, Odilning qabri yonida yig‘lab turgani, demakki Maftuna erini, bolalari otasini kechirganini namoish etish bilan tugaydi.