Bekatdagi muhabbat

Film Zafar ismli yigitning boy oilaning qizi Zarina bilan tanishuvidan boshlanadi. U Zarinaga ingliz tilini o‘rgatish uchun keladi, biroq qiz dars qilish o‘rniga suhbatlashishni afzal ko‘radi. Bir kuni Zarina Zafardan: “Qiziqarli hikoya aytib bering”, deb so‘raydi. Shunda Zafar “Sehrli uzuk” nomli hikoyani to‘qib ayta boshlaydi — filmning asosiy voqealari aynan shu hikoya orqali ochiladi.

Bobur ismli tortinchoq yigit har kuni Maftunani kuzatadi, ammo unga sevgisini izhor eta olmaydi. Kutilmaganda u bir kampirdan sehrli uzuk sotib oladi. Uzukni taqqan odam Boburni sevib qoladi. Dastlab bu holatni uning boshlig‘i Shaxzoda “tasdiqlaydi”. Keyinchalik uzuk tasodifan Maftunaning qo‘liga tushadi va u Boburga mehr qo‘yadi. Maftunaning unashtirilgan yigiti bunga qarshi chiqadi va ular o‘rtasida to‘qnashuv yuz beradi.

Shu jarayonda Zafar va Zarinaning munosabatlari ham chuqurlashadi — ular bir-birini sevib qolishadi. Film yakunida esa Bobur boshidan kechirgan barcha voqealar aslida tush ekanligi ma’lum bo‘ladi.