"Fantastik oila"

Ushbu film fantastik komediya janrida bo‘lib, bugungi kundagi ota-bola, er-xotin, yoshlar va yoshi kattalar o‘rtasidagi ayrim muammolar haqida hikoya qiladi. Barot va Mavluda er-xotin. Ularning bir nafar o‘g‘li va bir nafar qizi bor. Er-xotin o‘z farzandlari bilan kelisha olmaydilar. Bunga asosiy sabab — ularning boshqa zamon odamlari ekani, dunyoqarashlari va fikrlashlari bir-biriga mos kelmasligidir.

Opa-uka bir kuni ko‘chada ketayotib, nuroniy oqsoqolga duch kelishadi. Oqsoqol o‘g‘ilga sehrli damlama beradi. Opasi ukasiga qarab:

— Uni tashlab yubor, hech qachon yoningda olib yurma, — deydi.

Ammo qiziquvchan uka opasidan yashirincha damlamani uyga olib keladi va ovqatga qo‘shib yuboradi. Ertasi kuni tongda oilaning to‘rt a'zosi karaxt holga tushadi. Sababi — ularning o‘rinlari almashib qolgan edi. Ota o‘g‘lining qiyofasiga, o‘g‘il otasining qiyofasiga, ona esa qizining qiyofasiga, qiz onasining qiyofasiga kirib qolgan bo‘ladi. Ammo ularning dunyoqarashi va fikrlashi o‘zgarmaydi.

Shundan so‘ng asosiy voqealar boshlanadi. Barot o‘g‘lining o‘rniga imtihonga borishga majbur bo‘ladi. Otasiga ishonmagan o‘g‘il u bilan birga o‘qituvchining xonasiga kiradi. Ota o‘qituvchining savollariga javob bera olmaydi. Shundan so‘ng ular Barotning ishxonasiga borishadi. Tabiiyki, bu yerda otaning o‘rniga o‘g‘il ishlashga majbur bo‘ladi. Javlon ham qiynaladi.

Ko‘chaga chiqishgach, ota:

— Senga ham qiyin ekan, o‘g‘lim, — deydi.

O‘g‘il esa:

— Sizga ham oson emas ekan, dadajon, — deb javob qaytaradi.

Mavluda va Farangiz ham birga zarur ishlarni bitirib yurishadi. Ularda ham turli kulgili muammolar yuzaga keladi. Imkon qadar sezdirmasdan muammolarni hal etishga harakat qilishadi. Onaning kiyib olgan kiyimi qiziga, qizning kiyib olgan kiyimi esa onasiga yoqmaydi. Uyda ham qarama-qarshiliklar kundan kunga avj ola boshlaydi. Shu tariqa ular ikki-uch kun davomida bir-birlarining o‘rnida yashashga majbur bo‘lishadi.

Kutilmagan vaziyatlar ham ko‘p bo‘ladi. Masalan, Barotning yuziga o‘g‘lining do‘stlari kelib ochiq gapirishi yoki Javlonni Barotning do‘stlari tanimay, unga turli sirlarni aytib yuborishi va shunga o‘xshash hodisalar tez-tez uchrab turadi.

Film so‘nggida ular bir-birini tushunib yetishadi. Ammo o‘z holatlariga qayta olishmaydi. Opa-uka o‘sha oqsoqolni qidirishadi va uni topishadi. Biroq oqsoqol boshqa yordam bera olmasligini aytadi. So‘nggi epizodlarning birida uyda katta janjal bo‘ladi. Janjal avjiga chiqadi. Xuddi shu payt Javlon uyg‘onib ketadi va hammasi tush ekanini ko‘rib xursand bo‘ladi.

"Fantastik oila" filmining bosh g‘oyasi — ikki avlod o‘rtasidagi tortishuv va tushunmovchiliklarning oldini olish, bugungi kunda fan-texnika va internet jadal rivojlanganini yoshi kattalarga anglatish, farzandlarni esa ota-onani hurmat qilishga, ularni asrab-avaylashga va ko‘rsatgan yo‘l-yo‘riqlaridan chetga chiqmaslikka da'vat etishdan iborat.