«Kirakash»

Anvar — taksichi. U halol mehnatdan boshqa narsani tan olmaydi, blogerlik va raqamli kasblarni esa bekorchilik deb hisoblaydi. Ro‘zg‘or tanqisligi, xotini Dilnozaning doimiy noroziligi va farzandlarining kelajagi uning hayotini yanada og‘irlashtirib yuborgan.

Bir kuni u yo‘l chetidan ichida katta miqdorda dollar bo‘lgan hamyon topib oladi. Pulni olib qolish yoki egasiga qaytarish o‘rtasida uning qalbida qattiq ichki kurash boshlanadi. Qizi Sabinaning gaplaridan keyin Anvar vijdonini tanlab, hamyonning haqiqiy egasini izlashga qaror qiladi.

Bu ishda unga avval taksi haqini to‘lamay qochib ketgan yosh bloger Farangiz yordam beradi. U ijtimoiy tarmoqlar orqali hamyon egasini qidiradi, ammo bu xabardan foydalanmoqchi bo‘lgan aldamchilar ham paydo bo‘ladi. Anvarning eski do‘sti Salim esa pul miqdorini oshkor qilib, soxta da’vogarlarni yo‘naltiradi.

Nihoyat, haqiqiy ega topiladi. Anvar aldamchini fosh qilib, hamyonni o‘z sohibiga topshiradi. Ma’lum bo‘lishicha, bu pul Rossiyadan mehnat qilib qaytgan bir necha insonning oilalari uchun yuborilgan omonat ekan.

Bu voqea Farangizning videosi orqali keng tarqaladi. Anvar pul emas, halollik insonga eng katta boylik ekanini anglaydi. Oilasidagi munosabatlar ham o‘zgaradi: xotini uni tushuna boshlaydi, o‘g‘lining raqamli loyihasi esa muvaffaqiyat qozonadi.

Filmning asosiy g‘oyasi — haqiqiy boylik pulda emas, balki insonning vijdoni va omonatga sadoqatidadir.